نور الدويري تكتب
من فوائد الإهتمام بتوفر الأمن الغذائي والتركيز على دعم وفتح والإستثمار بالمواد الغذائية والزراعية هو تجنيب الدول الوقوع في تداعيات الأزمات الإقليمية والدولية خصوصا لأنها تدفع برفع أسعار عقود الموردين حول العالم وتؤثر القرارات والأزمات الدولية على أسعار النفط والبورصات بشكل كبير .
أن رفع أسعار السلع في السوق المحلي تأتي نتيجة إرتفاع أسعار عقود الموردين. بالعربي رح نعاني من إرتفاع متسارع بكل أنواع السلع والخدمات قريبا جدا وهينا بلشنا نحس بالارتفاع للاسف وهاد رح يأثر بالضرورة على حركة القوى الشرائية الي أصلا متغيرة وتميل للهبوط بمعظم السلع يعني مثلا قطاع الالبسة بنازع بالمعنى الحرفي للأسف وإذا ما تم تحريك السوق ودعم المستهلكين والمنتجين والموردين كلا حسب معايره رح نعاني أسوء أزمة إقتصادية بالمستقبل القريب ويمكن يرتفع جدا نسبة الكساد مقارنة بالأعوام السابقة .
صحيح لازم أحكي أعلنت هيئة الإستثمار من كم يوم عن إرتفاع الإستثمار بنسبة ٢٤% ما رح أدقق على الخبر بس رح أفتح أسئلة ما هي أنواع الاستثمارات؟ما حجم العملة الصعبة الي انضخت بالسوق المحلي؟ ما حجم تحويل أرباح الإستثمارات خارج البلد؟وطبعا كلنا منعرف من أفضل حلول الكساد خفض الفائدة والضرائب لإنعاش القوى والسوق المحلي وطبعا بدهم يضخوا سندات وغيرو من سوالف الإقتصاد بشرح كل مرة شغلة المرات الجاي.
الحقيقة بتقول انو في صعوبة بالتأثير على البنوك بتأجيل الأقساط والبنك المركزي بحاجة لمحددات معينة لخفض الفائدة او سعر الجودايبر صحيح الحمدلله الإحتياطي منيح بس القصة أكبر من توفر الإحتياطي لانو حجم الدين المحلي على الدولة ضخم واكبر من الي على البنك الدولي
ويمكن يكون في ضغط وقلق لتحريك الأموال لانو من الطبيعي بهيك وضع مخاطرة ضخمة تصرف فلوسك. في أشياء كثيرة بتحفظ أكتبها بس حبيت أوضحلكم الصورة للي مش عارف شو بصير يعني لما الملك وجه على دعم الغطاء الغذائي عشان نتجنب نعيش غلاء وكساد متسارع لانو طبعا مستوى الطلب بضعف أمام العرض….
بالعربي بتبهدل الكل ولما حكى الملك ضرورة الإعتماد على الذات لانو الديون والمساعدات شلت كثير قرارات .كنت بدي أكمل عن دور الإعلام لانو اهتماماتي مرتبطة دايما بين علاقة الإعلام بثالوث نمو أي دولة (الإقتصاد والسياسة والاجتماع) للهيك بتلاقوني بحكي بهالموضوع كثير بس لقيت حالي كتبت كتير بديش كثير تزهقوا وتصل المعلومة .حبيت أنشر هالمعلومات قبل ما تفيض كثير إشاعات بكتبلكم شوية شروحات كمان بعدين. جمعة مباركة
