الوعي بالذات

مهم جدا ان يفهم الانسان سمات ذاته الشخصية وان يكون له الوعي الكافي لكيفية فهم ذاته بالاضافة الى فهم كيفية تنمية ذاته ولذلك اقدم لكم سلسلة من الوعي بالذات

الوعى_بالذات      

    # ياترى لو سألتك أنت مين ؟ هتقول إيه ؟ 

# ياترى أنت عارف نفسك كويس – فاهم نفسك – عارف ايه مميزاتك وعيوبك ال محتاج تشتغل عليها وتعدلها ؟

# ياترى كلنا عندنا المهارة دي ؟ أو كلنا نعرف نعمل ده ؟

# وليه بنلاقنى حد يقدر يجاوب على السؤال الأول بطلاقة وتحس أنه فاهم نفسه كويس وحد تانى يسرح كثير علشان يقدر يجاوب ، وممكن يقولك مااعرفش ياترى أنك تعرف نفسك ده حاجة صعبة ولا ممكن نتعلمها ؟ 

# أكيد مافيش مستحيل بس قبل مانتعلم لازم نفهم ، وعلشان نفهم لازم نركز فى الكلام ال جاى شوية .شوف ياسيدى علماء النفس بيقولوا أن كل واحد مننا جواه ثلاث شخصيات لابسينه هههههه!!!!!!!!!!!!!أوعى تخاف ، الشخصيات دي موجودة معانا من وأحنا صغيرين وبنكتسبها من أسلوب التربية ، من البيئة اللي بنعيش فيها .مافيش مشكلة خالص انهم يبقوا موجودين معانا ، بالعكس لازم يكونوا موجودين . بس المهم والأهم أمتى بقى كل شخصية منهم تظهر .

💥بص يا سيدي احنا جوانا شخصية الطفل والوالد و الراشد ومش بس كده ده الطفل ده كمان له ثلاث اشكال من طفل (حر – متكيف وهادئ – عنيد) والوالد كمان بيظهر بشكلين (راعي وحنون – ناقد) و الراشد ده بقى الله عليه (العاقل الحكيم المتزن) لغاية هنا بقى و ما فيش مشكلة خالص لان الشخصيات دي كلها لازم تكون موجودة معانا و مهم جدا اني اغير في الشخصية اللي انا بلعبها حسب الموقف اللي انا فيه.

💥يعني مثلا وانا في رحلة مع اسرتي او تلامذتي ياترى هلبس انهي شخصية اكيد مش هلبس الوالد الناقد ولا الطفل العنيد انا هنا محتاج انتقل بين الطفل والوالد الراعي لان الموقف بيتطلب كده.

💥طيب لو انا في موقف بيتطلب قرار مصيري اكيد هلبس شخصية الراشد. وهكذا الوعي بالذات بقى اللي هو موضوعنا الاساسي هو انك تبقى عارف انت مين في اللحظه دي و متقمص أنهى  شخصية وهل الشخصية  اللي انت اخترتها دي مناسبة للموقف ده ولا لا.

💥وكمان مش بس كده ده اختياراتك لشخصية وترك شخصية لانك عارف عيوب و ميزات كل شخصية وبالتالي الشخصية لازم تكون مناسبة للموقف.

💥طب احنا كتير بنقابل ناس في حياتنا غريبة جدا، تلاقيه بيثور على موقف تافه جدا و يزعق بصوت عالى (الولد الناقد او الطفل العنيد) اللي بيصرخ ويثور لاتفه الاسباب. وتحاول تفرمله لكن مفيش فايدة و المشكلة بقى لما تواجه بمشكلته يصر ويقول انا معملتش حاجه غلط – انا صح.

💥اكيد الشخصيه دي معندهاش وعي بنفسها و شايفة نفسها صح (الذات المزيفة) الخادعة اللي بتخدع صاحبها طيب ليه الشخص الاول بقى كده والشخص الثاني بقى كده.

💥اكيد اسلوب التنشئة الاجتماعية اللي نشئوا فيه كان مختلف. بيئة بتسمع وتحتوي وتفهم وتحترم، وبيئة طول الوقت لوم ونقد ومقارنات واهانات واساءات. طب الحل ايه و هنعمل ايه✊✊✊•

💎 راقب نفسك وكل يوم استرجع ثلاث مواقف مرت بيك و حاول تكتب كل موقف وحدد نوع شخصيتك كانت مين (الطفل(حر-عنيد-مطيع) – الوالد (راعي-ناقد) – الراشد). •‏•

💎 بعد اسبوع هيبقى عندك 21 موقف مكتوبين حاول تشوف ايه اكثر شخصية غالبة عليك. حاول تشوف المواقف دي تاني وتشوف الشخصية دي كانت مناسبة للموقف ولا لا.•‏•

💎 لو الشخصية دي ما كنتش هي المناسبة حاول تفكر مين الشخصية اللي كنت لازم تكون لابسها وحاول تكتب او تعيد السيناريو تاني و شوف هتتعامل ازاي. •‏•

💎 تخيل نتائج تغيير الشخصية بالشخصية المناسبة.•‏•

💎 لو دربت نفسك على الكلام ده اكيد هتعرف نفسك اكتر.•‏ الكلام السابق ده علشان تقدر تنفذه لازم تفكر في شخصية مساندة تقدر تقدم لك الدعم والمساندة النفسية و تقوم معاك بدور (الوالد الراعي – الراشد).•‏

💧كلامنا ما انتهاش عن الوعي بالذات لانه اهم حاجة وحاجة كبيرة اوي وكلامنا لسه له بقيه في باقي سلسلة الوعي بالذات.

 ملهم مع تحياتي انا #ضياء الدين محمد